Bolt to Di Wurl
Twas Augus 3 in di year 2017 to bi exact
Wen Bolt enter 'im final race pon London track
All eyes wuz on di big man Bolt
fi si how 'im wouda bow out
Kiss mi neck back
A wah jus gwaan pon di track
Meck mi wipe di matta out mi eye
Bounty Killa wud a sey mi caant believe mi eyes
Gatlin finally get a gold
Coleman run second and Bolt run third
Bolt guh to Gatlin fi congratulate
An Gatlin bow dung to Bolt di great
Gatlin win di race fi true
Meck wi give 'im 'is due
Wholeheapa wi a wonda how dis 'two-time drug cheat'
Pull off dis great feat
Even doe a Gatlin win
Mi start fi put on a broad grin
Cause wen mi si who di camera dem a featcha
Di big man Bolt di Puma Ambassada
Mi feel proud suh till mi glad bag buss
Wen everybody inna di stadium a salute Bolt as if a 'im cum fuss
Bolt hats off to yuh mi genna
Yuh a Jamaica Ambassada
Lawd Sebastian Coe seh 'im nuh eulogistic
Guess 'im tink Gatlin win wuz not nostalgic
Shakespeare seh all di wurl is a stage an all di man dem an woman dem merely playaz
Mi know beyond a shadow of a doubt dat yuh have been a great playa
Yuh gi it yuh best
Suh now yuh deh pon a different quest
An so fi now jus teck a bow
Mi goin miss yuh whole heap but mi naw guh cry
Adios amigos, adieu, farewell, auvoir goodbye!
Docta Di Hon. Usain St Leo Bolt
Yuh wi foreva bi di G.O.A.T
Sharon Wright
LONDON BOO
Cassandra, she wet up arself!
Cedrick bawl eye waata!
Youlanda faint weh braps pan spot
Mi noh know wah go dung awfta
Is hospital mi fine miself
Even now mi still in shak
Fi si seh Gatlin edge out Usain
Pon dat London Stadium trak!
Mi understand is game yu nuh
An smaddy have to win
But why in Jesus precious name
It tun out to be Gatlin?
One patient call im 'Dopey'
Mi look pon har
Mi eye get wide
Mi stawt wanda if dem give im sinting
Dat genetically modified!
Mi tink mi verbalise di tawt
Cause di nurse try hide a grin
Mi seh "Congrats to di man up front
Doah fi me, is di third man win!"
Hear di nurse "So is who come second?"
Hear one patient "Cho! Noh Boo!"
Di second place sprinter was a duppy!"
Di nurse gi out "Is true!"
Professional ethics pap down!
All doctor lawf so till him blue
Fi mi winner bolt, fi third place
While di man up front get
Boo!
Mi doan want to be disparaging
Mi spirit tek Gatlin
Im cause mi fi reach hospital, yes
But im get a firs' class booing!
Erica Brown Marriott