Selection of poem from our readers

WEB DECREE

 

 

Yes!

Mi glad fi wat a happen.

Papa, dis is sweet.

Mi gwine shut di door pon medicine

Fi turn class athlete!

Is not a trick dis Papa

An is not jus bout di money.

Mi waa fi run like lightening

So dem mek statue a mi!

No!

It kyaa be wen mi dead Papa

Cause honour laas pon duppy!

Mi want i' mek wen mi alive

So even mi can look pon I'.

Den, outside of getting payment

Fi mi job as athlete

Mi can get homecoming celebration

An even monetary treat.

Doan look so clueless Papa.

Wen me run an please di crowd

Dis country mus reward mi

Fi mek everybody proud.

Wat yu grumblin' bout now sah?

Shif' di cobweb mek mi hear!

You really tink is tax gwine use

Fi back di whole affair?

Maybe yu right mi gran-faada

Cause who going in dem pakit

Fi tek cash splurge pon athlete, jus so?

Yu know wat, mek wi drop it.

But as mi indicate before

Yu naa lose off dis gran.

Me, yu gran-bwoy Anancy

Gwine put pon pedestal!

Until such time doah Papa

Please massage mi foot fi mi

An bring wet rag fi wipe dem off cause

Mi dida run barefoot

Dem dutty!

- Erica Brown Marriott